Эксперт – Мусаның ҚПЛ-дағы мүмкіндігі туралы: Мартыновичтен оп-оңай өтіп кетеді

Ресейлік журналист Микеле Антонов ASnews.kz сайтына берген сұхбатында ЦСКА-ның бұрынғы шабуылшысы Ахмед Муса «Қайсарға» ауысса, Қазақстан чемпионатының жұлдызы болады деп есептейді.

«Мусаны Қазақстан үшін тым кәрі ойыншы деп ойламаймын. 33 жас – футболшының нағыз кемеліне жеткен шағы. Ибрагимович 41 жасқа дейін ойнады. Вагнер Лав 36 жасында «Қайратқа» келді. Қазір 41-жасында Бразилияның екінші лигасында ойнап, әлі де көзге түсіп жүр.

Мусаның Нигерия чемпионатының соңғы екі маусымында 37 матч өткізіп, 13 гол соққанын көрдім. Демек, гол соғуды әлі ұмытқан жоқ. Сондықтан ол ҚПЛ-да өзін көрсете алады. Менің есімде, ол Ресейдегі ең мықты шабуылшылардың бірі болды – жылдам, епті еді», – деді Антонов.

Журналистің пікірінше, егер Муса жарақаттан аман болса, жақсы нәтиже көрсете алады және ҚПЛ қорғаушыларынан оңай өтіп кетеді.

«Бір маусымда 15 гол соғу оның қолынан келеді. Ең бастысы – толыққанды дайындықтан өтіп, жарақат алмауы керек. Өйткені оның «темірдей» ойыншы емес екенін, жарақатқа бейім екенін білеміз.

Жылдамдығы әлі де бар. Мен «Қайраттың» ойындарын көрдім, Муса өзінің шапшаңдығы мен күшінің арқасында сол Александр Мартыновичтен де оңай қашып кетеді деп ойлаймын. Қарсылас кім болса да, төтеп бере алады. Сондықтан бұл ауысымға мен тек «қолдаймын», – деп түйіндеді сарапшы.

33 жастағы Ахмед Муса – мәскеулік ЦСКА клубының бұрынғы ойыншысы, осы команда құрамында үш рет Ресей чемпионы атанған.

Ақпан айының басында БАҚ беттерінде қызылордалық «Қайсардың» Мусамен келіссөз жүргізіп жатқаны туралы ақпарат пайда болды.

Бұған дейін «қасқырлар» сапын Мусаның Нигерия құрамасындағы бұрынғы әріптесі Виктор Мозес толықтырған еді.