«Ақтөбе» футболшысы – Нанидің деңгейі жайлы: Фернандиньо және Мхитарянмен бір қатарға қоямын

«Ақтөбе» клубының украиналық қорғаушысы Иван Ордец ASnews.kz сайтына берген сұхбатында португалиялық футболшы Луиш Нанидің «ақ-қызылдар» сапына ауысқаны туралы пікір білдірді.

«Нани – менің мансабымдағы ең жұлдызды командаластарымның бірі. Ол – әлемдік деңгейдегі жұлдыз. Осындай ойыншылар клубқа келгенде, командадағы әрбір футболшыны шабыттандырады. Тек прогресс болады деп үміттенемін.

Оның қасиеттері туралы айтатын болсам, мен «Шахтерде» жүргенде Дуглас Коста мен капитанымыз Дарио Срна да өте жоғары деңгейде ойнады. Виллиан негізгі құрамда ойнағанда, мен бірінші командамен жаттығып жүрдім, бірақ дубльде өнер көрсеттім. Сондай-ақ Фернандиньо мен Мхитарян да болды. Бұл – нағыз топ-деңгейдегі футболшылар.

Аты аталған жігіттер «Манчестер Юнайтед», «Арсенал», «Сити», «Челси», «Бавария» сияқты клубтарда ойнаған. Бұл олардың тәжірибелі футболшы екенін білдіреді. Салыстыратын болсақ, Нани дәл сол деңгейдегі ойыншы», – деді Ордец.

«Ақтөбе» жаңа маусым басталар алдында «Манчестер Юнайтед» сапында ойнаған және Еуропа чемпионы атанған Луиш Наниді қатарына қосты.