Қазақстан құрамасының экс-бапкері – «Қайраттың» жаңа ойыншысы жайлы: ол гауһар тасқа айналуы мүмкін

Бұған дейін қарағандылық «Шахтер» мен Қазақстан жастар құрамасын жаттықтырған финляндиялық бапкер Юха Малинен ASnews.kz сайтына берген сұхбатында отандасы Ойва Юкколаның алматылық «Қайратқа» ауысуы жөнінде пікір білдірді.

Алматылық клубтың жаңа ойыншысын жақсы білетін 67 жастағы маман оның әлеуетін жоғары бағалады.

«Мен оны жақсы танимын. Ол бірнеше маусымды өте жоғары деңгейде өткізді. Көптеген сарапшылар оны өткен маусымдағы лиганың ең үздік жас ойыншысы деп санады. Бәлкім, солай да шығар, бірақ қалай болғанда да, оның жаңа деңгейге көтерілетін уақыты келді.

Ойва – жылдам, физикасы мығым және жеңіске деген мінезі бар футболшы. Оның «Қайратқа» ауысуы туралы айтар болсам: егер жас ойыншыны дұрыс жаттықтырып, оны түсіне білсе, ол нағыз гауһар тасқа айналуы мүмкін. Дәл Оксанен секілді!

Алайда Чемпиондар лигасындағы қысым өте жоғары, сондықтан оған уақыт қажет болады және қателіктері арқылы үйренуге мүмкіндік беру керек», – деді Малинен.

«Қайрат» Финляндия құрамасының 23 жастағы вингерімен 2027 жылдың соңына дейін жарамды келісімшартқа отырды. Юккола «Ильвес» клубының түлегі. Өткен маусымда 37 матч өткізіп, сегіз гол мен жеті нәтижелі пастың авторы атанды. 2025 жылдың күзінде Финляндия құрамасында дебют жасады.

Юха Малинен Қазақстанда 2007 жылы жұмыс істеп, «Шахтерды» және еліміздің жастар құрамасын (U-21) жаттықтырған болатын.