Қазақстандық клубтарға АПЛ мен Англия құрамасының бұрынғы жұлдызы ұсынылды

«Ливерпуль», «Ньюкасл» және Англия құрамасының бұрынғы жартылай қорғаушысы Джонджо Шелви мансабын Қазақстан Премьер-лигасында жалғастыруы мүмкін, деп хабарлайды ASnews.kz.

Ақпаратқа сәйкес, 33 жастағы хавбек еліміздің бірқатар клубтарына ұсынылған.

Қазіргі уақытта Шелви БАӘ-нің екінші дивизионындағы «Арабиан Фэлконс» клубында өнер көрсетуде. Ол аталмыш командаға 2025 жылдың қыркүйегінде еркін агент ретінде ауысқан. Бұған дейін футболшы қысқа мерзім ішінде бірнеше рет командасын ауыстырып үлгерді, олардың қатарында түркиялық «Ризеспор» мен «Эюпспор», сондай-ақ англиялық «Бернли» бар.

Жартылай қорғаушы кәсіби мансабында 492 матч өткізіп, 58 гол соққан және 66 нәтижелі пас берген. Одан бөлек, Шелвидің еншісінде Англия құрамасында өткізген алты ойын бар. Ол мансабының басым бөлігін Ағылшын Премьер-лигасындағы «Ливерпуль», «Суонси» және «Ньюкасл Юнайтед» клубтарында өткізді.

Бұған дейін «Қайсар» «Ливерпуль» мен «Челсидің» бұрынғы жартылай қорғаушысы Виктор Мозесті, ал «Ақтөбе» «Манчестер Юнайтедтің» бұрынғы жұлдызы Луиш Наниді қатарына қосқан болатын.