Скаут – «Тобылдың» жаңа шабуылшысы жайлы: он гол соғады және Мусадан асып түседі

Өзбекстан нарығына маманданған ресейлік скаут Николай Егорычев ASnews.kz сайтына берген сұхбатында «Тобыл» шабуылшысы Рубин Хебайдың болашағын бағалады.

«2023 жылы Хебай «Әндіжан» сапында Өзбекстан Суперлигасының үздік шабуылшыларының бірі болды, лиганың үздік бес форвардының қатарына сенімді түрде кірді. Кейін ол тиімді ұсыныспен Сауд Арабиясының екінші лигасына кетті, бірақ ол жақта ұзақ тұрақтамады.

Өзбекстанға оралған соң ол бірден көзге түсе қоймады, десе де 2025 жылғы маусымның екінші жартысын «Соғдианада» жаман өткізбеді. Алайда, бұл бұрынғы бабы келіскен шағындағы Хебай емес. Ол кездегі нәтижелілікті («Әндіжандағыдай») қайталауы екіталай, бірақ егер бабына келіп, бейімделіп кетсе – пайдасы тиеді. Конференция лигасының деңгейін көтере алады», – деп есептейді Егорычев.

Скаут Хебайдың жағдайы «Қайсар» қызығушылық танытып отырған ЦСКА-ның бұрынғы форварды Ахмед Мусадан гөрі тәуірлеу деп санайды.

«Егер Мусамен салыстырсақ, Хебайдың трансфері ұтымдырақ көрінеді. Муса – мансабы анық құлдырап бара жатқан адам. Ал Хебай, барлық нюанстарға қарамастан, әлі нағыз күш-қуаты толысқан шағында.

Бұл «супер-топ» трансфер болады деп ойламаймын, бірақ ол маусымда өз ондығын (10 гол) соғуы керек. Егер бір жыл жарақатсыз ойнаса – 10 доп соғуға шамасы жетеді», – деп түйіндеді маман.

Еске салайық, қостанайлық «Тобыл» 27 жастағы албаниялық шабуылшы Рубин Хебаймен келісімшартқа отырғанын жариялады.

Хебайдың футбол жолы албаниялық «Влазния» клубының жүйесінде басталды (U-15). Кейіннен шабуылшы словениялық «Домжале», албаниялық «Партизани» мен «Теута», солтүстік македониялық «Шкендия», сауд арабиялық «Аль-Ороба», украиналық «Ворскла» және өзбекстандық «Әндіжан» клубтарының намысын қорғады. «Тобылға» ауысар алдындағы соңғы клубы – Жызақтың «Соғдианасы».