Ресей құрамасының бұрынғы жартылай қорғаушысы Қазақстанға келуден бас тартты

Белгілі ресейлік футболшы Даниил Уткин биылғы қысқы маусымаралық үзілісте қазақстандық клубтардың біріне ауысуы мүмкін еді, деп хабарлайды ASnews.kz.

26 жастағы футболшының қызметі оны алты айға немесе бір жылға жалға алуға қызығушылық танытқан ҚПЛ клубтарына ұсынылды.

РПЛ-дің ағымдағы маусымында Уткин «Балтика» сапында бар болғаны бір матч өткізді, сол себепті ол тұрақты ойын тәжірибесіне ие болатын нұсқа іздеді. Қазақстанда оған құрамнан орын уәде етілді, алайда Уткин мәскеулік «Торпедоға» ауысуды жөн көрді.

Уткин «Краснодар», «Ростов» және «Ахмат» сапындағы ойындарымен танымал. Ол Ресейдің ең дарынды футболшыларының бірі саналған. Өз елінің ұлттық құрамасы сапында екі ойын өткізіп, бір гол соққан.