«Ақтөбенің» экс-футболшысы – «Циндаоға» ауысқаны туралы: Қытайда барлық жағдай жасалған

Бұған дейін «Ақтөбеде» ойнаған сербиялық қорғаушы Неманья Анджелкович ASnews.kz сайтына берген сұхбатында «Циндаоға» ауысқаннан кейінгі алғашқы әсерімен бөлісті.

«Бейімделу процессі өте жақсы жүріп жатыр, клубтағылар мені керемет қарсы алды, командаға тез сіңісіп кеттім. Жаттықтырушылар да керемет әрі ойыншылармен қалай жұмыс істеу керегін біледі – бұл өте маңызды фактор. Жақсы нәтижелерге жетеміз деп үміттенемін. Мұндағы футбол деңгейі жоғары, ал жасаған жағдайлары тіпті керемет», – деді Анджелкович.

«Циндаода» сербиялық футболшы қазақстандық жанкүйерлерге жақсы таныс, соңғы жылдары «Тобылда» доп тепкен жартылай қорғаушы Ахмед Эль-Мессаудимен бірге ойнайды.

«Иә, Ахмед екеуміз біргеміз. Екеуіміз де командаға жақсы бейімделіп алдық. Бұған Қазақстанда бірге ойнағанымыз және алаңда бір-бірімізді жақсы танитынымыз көмектесті.

Ауыспас бұрын Георгий Жуковпен сөйлеспедім, бірақ мұнда ойнаған достарым көп болды, олардың бәрі Қытай туралы тек жақсы пікір айтты», – деді Неманья.

Анджелкович «Ақтөбеге» 2025 жылдың қаңтарында қосылған еді. «Қызыл-ақтардың» сапында 29 матч өткізіп, бір гол соқты, екі нәтижелі пас берді. Бұған дейін қорғаушы Ресейдің «Химки» мен «Акрон» клубтарында, сондай-ақ Әзербайжанның «Зиря» командасында ойнаған.