Скаут – Ахмед Мусаның «Қайсарға» ауысуы жайлы: спорттан гөрі маркетингке жақын

Өзбекстан нарығында жұмыс істейтін ресейлік скаут Николай Егорычев ASnews.kz сайтына берген сұхбатында ЦСКА-ның бұрынғы шабуылшысы Ахмед Мусаның «Қайсарға» ауысу мүмкіндігін бағалады.

«Егер Мусаны кейіннен Қазақстанда ойнаған РПЛ-дің басқа өкілдері – Аршавин, Тимощук және Вагнер Лавпен салыстырсақ, онда Муса олардың қасында әлдеқайда төмен орналасқан. Ол мансабының құлдырау кезеңінде тұр.

Аршавин «Зениттен» кейін бірден келді десе де болады, Тимощук «Қайратқа» ауысардан екі жыл бұрын «Баварияда» ойнаған, ал Вагнер Лав – нағыз уникум. Бразилиялық футболшы 41 жаста болса да, әлі ойнап жүр. Салыстыру үшін: 2023 жылғы маусымда Вагнер Лав 38 жасында Бразилияның В Сериясында «Спорт Ресифи» сапында 11+3 көрсеткішін тіркеді», – деді Егорычев.

Сондай-ақ скаут Мусаның басты қаруы – жылдамдығы жылдар өте келе тиімділігін жоғалтуы мүмкін екенін атап өтті.

«ЦСКА ойыншысы ретінде Муса ең алдымен жылдамдығымен есте қалды. 33 жасында ол 2010 жылдардың ортасындағыдай жүйрік емес шығар. Ахмед өз тәжірибесінің арқасында жаңа клубына пайда әкелуі мүмкін (әрине, трансфер жүзеге асса), бірақ одан аса жоғары нәтиже күту қиын. Мусаның трансфері спорттық қадамнан гөрі, маркетингтік қадамға көбірек ұқсайды», – деді маман.

БАҚ мәліметінше, «Қайсар» қазір Нигерия чемпионатында «Кано Пилларс» сапында өнер көрсететін 33 жастағы вингермен келіссөз жүргізіп жатыр.