«Ақтөбенің» жаңа шабуылшысы – Нанидің ауысуы туралы: бейімделуіне көмектесеміз

«Ақтөбенің» жаңадан қосылған шабуылшысы Айдын Желькович ASnews.kz сайтына берген сұхбатында командаға португалиялық жұлдыз Луиш Нанидің келуіне қатысты пікір білдірді. 

«Әрине, бұл сенгісіз жайт. Бұл – керемет жаңалық. Барлығымыз оның қандай керемет мансап жолын өткергенін білеміз. Нани біздің командамызға да көп нәрсе қосады деп үміттенеміз.

Біз команда ішінде бұл туралы көп сөйлеспедік, бірақ Луиштің сапалы әрі тәжірибелі ойыншы екені белгілі. Бәріміз де оның келгеніне қуаныштымыз. Ол – менің мансабымдағы ең мықты әрі жұлдызды әріптесім», – деді Желькович.

Сондай-ақ, легионер жаңа әріптесінің тіл табысуына көмектесуге дайын екенін жеткізді.

«Әрине, мен оған көмектесуге дайынмын. Нани ағылшынша сөйлейді, мен де білемін. Командада шет тілін білетін жалғыз мен емеспін, басқа жігіттер де бар. Құдай қаласа, оның үйренісіп кетуіне жәрдемдесеміз», – деп қорытындылады футболшы.

Еске салайық, жақында «Ақтөбе» швециялық шабуылшы Айдын Жельковичпен келісімшарт жасасқан еді. 28 жастағы футболшы өткен маусымда Швеция жоғары лигасындағы «Вернаму» сапында 27 ойын өткізіп, жеті гол соққан және екі нәтижелі пас берген. Оның трансферлік құны 600 мың еуроға бағаланады.

Сондай-ақ, «қызыл-ақтар» биылғы маусым алдындағы ең ірі трансферді жасап, «Манчестер Юнайтедтің» экс-жұлдызы Луиш Наниді қатарға қосқан болатын.