DAZN тілшісі – Мозестің трансфері жайлы: мансабын аяқтау үшін алғашқы қадамды жасады

DAZN телеарнасының италиялық комментаторы әрі журналисі Джованни Марруччи ASnews.kz сайтына берген сұхбатында Еуропа жұртшылығы Виктор Мозестің Қазақстан Премьер-лигасына (ҚПЛ) ауысуын қалай қабылдағанын айтып берді.

«Шынымды айтсам, Еуропада мұндай лигаларға ауысу көбіне мансабының аяқталуына қарай жасалған алғашқы нақты қадам ретінде қабылданады. Негізгі еуропалық турнирлерден кеткен ойыншыларға бұқаралық ақпарат құралдары аса көп көңіл бөлмейді. Бұл әлі де топ-лигалардан төмен деңгейде саналатын Сауд Арабиясына кеткен футболшыларға да қатысты.

Мәселен, Италияда адамдар Роналду немесе Месси туралы сирек айтады. Олар ерекше гол соқса немесе көзге түсетін бірдеңе жасаса ғана еске алады», – деп түсіндірді Марруччи.

«Зейнеткер» деген мәртебесіне қарамастан, италиялық журналист Мозес Қызылордаға жай ғана уақыт өткізу үшін келмеді деп есептейді.

«Иә, Мозес қазір мансабының соңғы кезеңінде тұр. Бірақ оның «Интерде» көрсеткен кәсібилігі мен еңбекқорлығын ескерсек, Қазақстанда да жоғары деңгейде ойнап, команданың ойынына ықпал ете алатынына сенімдімін», – деп қорытындылады журналист.

Қызылорданың «Қайсар» клубы Виктор Мозеспен «1+1» жүйесі бойынша келісімшартқа отырды. Белгілі вингердің трансферлік құны 300 мың еуроға бағаланып отыр.