Луиш Нани – «Ақтөбеге» ауысуы жайлы: Бұл ұлы клуб екенін білемін

«Ақтөбенің» португалиялық жаңа ойыншысы Луиш Нани командамен келісімшартқа отырғаны жөнінде пікір білдірді, деп хабарлайды ASnews.kz.

«Бұл жобаның бір бөлігі болғаныма өте қуаныштымын. «Ақтөбенің» Қазақстандағы ұлы клуб екенін білемін, сондықтан оның дамуына өз үлесімді қосқым келеді.

Қалада футболды қалай сүйетінін, қалай түсінетінін көрдім. Жаңа команда жейдесінде алаңға шығатын сәтті асыға күтемін. Қала әкімдігіне және клуб басшылығына шақырғандары үшін алғысымды білдіремін», – деді Нани.

39 жастағы португалиялықпен келісімшарт тура бір жылға жасалды.

Нани – Португалия құрамасы сапында Еуро-2016 чемпионы. Клубтық деңгейде вингер «Манчестер Юнайтедпен» бірге Чемпиондар лигасы мен Клубтар арасындағы әлем чемпионатын жеңіп алған, сондай-ақ төрт дүркін АПЛ чемпионы атанған. Бұдан бөлек, ойыншының еншісінде «Спортингпен» бірге қол жеткізген үш Португалия Кубогы бар. Бұған дейін ол «Фенербахче», «Валенсия» және «Лацио» сапында өнер көрсеткен.