ҚПЛ-дың экс-шабуылшысы – Мозестің «Қайсарға» баруы жайлы: ол біздің менталитетке үйреніп қалған

ҚПЛ клубтарының нигериялық экс-шабуылшысы Стэнли Нкоби ASnews.kz сайтына берген сұхбатында отандасы Виктор Мозестің қызылордалық «Қайсарға» ауысуына қатысты пікір білдірді.

Нкоби «Челсидің» бұрынғы жұлдызы Ресей премьер-лигасындағы тәжірибесі мен тіл білуінің арқасында Қазақстанға тез бейімделеді деп сенімді.

«Мозес футболдағы кумирлерімнің бірі болды. Маған оның ойынын, әсіресе гол соққаннан кейінгі фирмалық сальтосын тамашалаған ұнайтын. Ол – қарапайым және өте жігерлі ойыншы», – деді Стэнли.

Форвардтың пікірінше, Қызылордаға көшу «Спартактың» экс-ойыншысы үшін таңсық болмайды, ал трансфердің өзі ҚПЛ-ға жаңа аудиторияны тартады.

«Жақында ғана ол Ресей лигасында ойнады, сондықтан Қазақстанға келу ол үшін біртүрлі жаңалық болмайды деп ойлаймын – ол орыс тілі мен менталитетке үйреніп қалған.

Мозестің келуі Нигерия тарапынан да, бүкіл әлем тарапынан да елге назар аудартатынына сенемін. Бұл танымал ойыншыларға қазақстандық футбол туралы көбірек білуге көмектеседі. Оның келуі тек «Қайсар» жанкүйерлеріне ғана емес, бүкіл Қазақстанға үлкен қуаныш сыйлайды», – деп қорытындылады Нкоби.

Еске салайық, жақында Виктор Мозестің «Қайсарға» ауысатыны белгілі болды. 35 жастағы жартылай қорғаушы бір жылдық келісімшартқа қол қояды деп күтілуде. Жұлдызды жаңа ойыншының ресми таныстырылымы 24 қаңтарда Қызылордада жоспарланған.

Мозес – «Челси» сапында АПЛ, Еуропа лигасы және Англия кубогының жеңімпазы. Сондай-ақ ол «Ливерпуль», «Интер» және мәскеулік «Спартак» клубтарындағы ойындарымен танымал. Нигериялықтың соңғы жұмыс орны ағылшындық «Лутон Таун» болды.

Бұған дейін ресейлік спорт сарапшысы және журналист Микеле Антонов Мозестің қазақстандық клубқа ауысуына қатысты пікір білдірген болатын.