ҚПЛ-дың португалиялық футболшысы – Нани жайлы: ҚПЛ-дың танымалдығын арттыра түседі

Елордалық «Жеңіс» клубының бұрынғы жартылай қорғаушысы Гонсалу Тейшейра ASnews.kz сайтына берген сұхбатында португалиялық футболшы Луиш Нанидің «Ақтөбеге» ауысуы жайлы пікір білдірді.

Кезінде «Манчестер Юнайтедте» доп тепкен ойыншының отандасы бұл трансфер Қазақстан футболы үшін маңызды имидждік қадам болатынын атап өтті.

«Нанидің «Ақтөбеге» ауысуы туралы жаңалықты естіген жоқпын, бірақ бұл жақсы хабар. Әсіресе Қазақстан чемпионатын әлсіз деп санайтын адамдар үшін. Мұндай трансфер турнирдің танымалдығын арттыра түседі», – деді Тейшейра.

Сондай-ақ португалиялық футболшы 39 жастағы Нанидің физикалық дайындығына тоқталды.

«Ол әлі де өзінің ең үздік қабілеттерін көрсете алады деп сенемін. Нани біраз уақыт ойын практикасы болмаса да, өзіне мұқият қарайтын ойыншы. Сондықтан оның жоғары деңгейде ойнай алатынына күмәнім жоқ», – деп түйіндеді футболшы.

бұған дейін БАҚ беттерінде Чемпиондар лигасының жеңімпазы әрі Англияның төрт дүркін чемпионы Луиш Нанидің «Ақтөбемен» келісімшартқа отыратыны туралы ақпарат тараған болатын.

Гонсалу Тейшейра өткен маусымда елордалық «Жеңіс» клубының намысын қорғады, алайда жазғы трансферлік кезеңде командадан кетті. Футболшының айтуынша, клубтан кетер алдында ҚФФ-ның бас хатшысы әрі Астана мәслихатының депутаты Тейшейрадан командада қалуын сұраған.