«Ақтөбенің» экс-капитаны – Пасторица туралы: онымен «Ақтөбеге» ауыспас бұрын сөйлестім

«Ақтөбе» клубының экс-капитаны Леонель Струмия ASnews.kz сайтына берген сұхбатында «қызыл-ақтардың» жаңа ойыншысы Агустин Пасторицамен әңгімелескенін хабарлады.

«Агустин «Ақтөбеге» ауысар алдында сөйлестік. Қолымнан келгенше оған барлық қажетті мәселелер бойынша көмектесуге тырыстым. Қазақстанға көшкеннен кейін өзі мен жанұясында бәрі жақсы болады деп үміттенемін», – деді 33 жастағы футболшы.

29 жастағы аргентиналық вингер «Ақтөбеге» испаниялық «Культураль Леонеса» клубынан ауысып келді. «Пибе» деген лақап атпен танымал ойыншы Сегундада 14 матч өткізіп, 2 нәтижелі әрекетпен көзге түсті.

Струмия 2025 жылдың басында Қазақстан Премьер-лигасынан кетті. Кипрдің АЕЛ және Черногорияның «Будучность» клубтарында ойнаған аргентиналық жартылай қорғаушы қазір еркін агент ретінде клубсыз жүр.