Струмия – «Ақтөбенің» жаңа жұлдызы туралы: Нанидің жасына қарамаңыздар

«Ақтөбенің» бұрынғы капитаны Леонель Струмия ASnews.kz сайтына берген сұхбатында португалиялық футболшы Луиш Нанидің трансферіне қатысты пікір білдірді.

«Нанидің «Ақтөбеге» келуі мүмкін екені туралы мен де естідім. Ол – тәжірибесі мол, абырой-атағы бар футболшы. Біреуді тек жасына қарап бағалау – қате. Футболшының жасын емес, алаңдағы ойынын бағалау керек. Мысалы, «Қайрат» пен «Астананың» егде жастағы капитандары команданың нәтижесіне қаншалықты үлес қосып жүргенін көріп отырмыз, сондықтан тек санға байланып қалудың қажеті жоқ.

Луиштің физикалық жағдайы қандай екенін білмеймін, бірақ «Ақтөбеге» келу үшін ойыншы 110 пайызға дайын болуы тиіс. Қаншалықты атақты футболшы болсаң да, бұл клубта әрдайым жоғары деңгейде өнер көрсету керек», – деді аргентиналық футболшы.

БАҚ мәліметінше, «Манчестер Юнайтед» сапында Чемпиондар лигасын жеңіп алған Луиш Нани алдағы күндері «қызыл-ақтармен» келісімшартқа отырады.

Черногорияның «Будучность» клубынан кеткеннен кейін Леонель Струмия еркін агент атанды. Екі жыл бұрын ол «Ақтөбенің» капитаны болған еді.

Бұған дейін Қазақстан құрамасының және алматылық «Қайраттың» жартылай қорғаушысы Әділет Садыбековтің «Ақтөбеге» ауысатыны хабарланған болатын.