Газзаев – «Ақтөбенің» трансфері жайлы: Нани жылдамдығын жоғалтқан, бірақ шеберлігі әлі орнында

«Ақтөбенің» бұрынғы бас бапкері Владимир Газзаев ASnews.kz сайтына берген сұхбатында португалиялық футболшы Луиш Нанидің трансферіне қатысты пікір білдірді.

«Клубта жеке инвестордың пайда болғаны қуантады. Осыдан кейін чемпионатта да, ел кубогында да алға қойған мақсаттарға жетуге болады. «Ақтөбе» секілді үлкен клуб әрдайым жүлделер үшін күресуі тиіс. Қазір дайындық кезеңі жүріп жатқандықтан, трансферлік саясатты нақты жүргізіп, маусымға тактикалық әрі физикалық тұрғыдан жоғары деңгейде дайындалу маңызды.

Наниға келсек, ол жоғары деңгейде ойнаған футболшы. Алайда «Ақтөбенің» нақты мақсатын білмей тұрып, оның келуі туралы пікір айту қиын. Жасына байланысты Луиш жылдамдығы мен физикалық бабын жоғалтқан болуы мүмкін, бірақ оның тәжірибесі мен шеберлігі бар. Егер бұл қадам маркетингтік жүріс болса, оның да артықшылықтары бар – бүкіл әлемге танымал португалиялық ойыншы мансабында көптеген трофейлер жеңіп алған», – деді маман.

Жақын күндері «Манчестер Юнайтед» пен Португалия құрамасының бұрынғы вингері «қызыл-ақтармен» келісімшартқа отырады. Ол 2024 жылдың желтоқсанында кәсіби мансабына нүкте қойған еді.

Владимир Газзаев 2014–2015 жылдары «Ақтөбені» жаттықтырған. Сондай-ақ ресейлік бапкер «Тобыл» мен «Тұран» клубтарында да жұмыс істеді.