Танымал шабуылшының інісі мансабын ҚПЛ-да жалғастырады: топ-клубтан ұсыныс бар

Сенегалдық вингер Оноре Гомис қазақстандық клубтардың біріне ауысуға жақын, деп хабарлайды ASnews.kz.

29 жастағы қапталда ойнайтын шабуылшы Премьер-лигадағы үш командамен келіссөз жүргізуде. Олардың екеуі үздік үштікке кірмесе, үшіншісі – еурокубок қатысушысы. Тбилисилік «Динамоның» бұрынғы футболшысы болашағына қатысты нақты шешімді бірнеше күн ішінде қабылдайды деп күтілуде.

Гомис грузиялық клубтан осы жылдың басында кеткен еді. Сондай-ақ ол «Дила» және «Динамо» (Батуми) сапында өнер көрсетті. Грузия чемпионатындағы 106 матчта африкалық ойыншы 38 нәтижелі әрекетпен көзге түсті.

Айта кетейік, Оноре Гомис – танымал футболшылар Бафетимби Гомис пен Нампалис Мендидің інісі.

40 жастағы Бафетимби Гомис Францияда «Сент-Этьен», «Лион», «Марсель» клубтарында ойнап, Лига 1-де 122 гол соққан. Ал 33 жастағы жартылай қорғаушы Нампалис Менди ағылшындық «Уотфорд» сапында ойынын жалғастыруда.

Оноре Гомис түркиялық «Хатайспор» және беларусьтік «МЛ Витебск» клубтарының намысын қорғаған. Оның трансферлік құны 150 мың еуроға бағаланып отыр.