Нанимен ойнаған футболшы – «Ақтөбеге» ауысу жайлы: жай ғана уақыт өткізбейді

«Қарабақ» пен Әзірбайжан құрамасының қақпашысы Шахрудин Магомедалиев ASnews.kz сайтына берген сұхбатында португалиялық жұлдыз Нанидің «Ақтөбеге» ауысуы туралы ақпаратқа пікір білдірді.

«Команданы алаңға шықпай-ақ күшейтуге болады. Нани – ешқандай асыра сілтеусіз футбол аңызы. Ол киім ауыстыратын бөлмеде және жаттығуларда өте маңызды футболшы, әрқашан қолдау көрсетіп, әсіресе жастарға ақыл-кеңесін айтып отырады.

Сондықтан, Луиш бабында болмаса да, командаға көмектеседі. Ол өзін күтетін нағыз кәсіби маман. Егер Нани «Ақтөбеге» ауысуды шешсе, оның жай ғана уақыт өткізу үшін келмейтіні анық», – деді Магомедалиев.

Магомедалиев пен Нани 2023/24 жылғы маусымда түркиялық «Адана Демирспор» сапында бірге өнер көрсеткен. Футболшылар бірге 16 ойын өткізді.

Айта кетейік, сол маусымда Нани түркиялық клуб сапында «Ақтөбе» түлегі әрі Қазақстан ұлттық құрамасының шабуылшысы Абат Айымбетовпен бірге үш матчқа қатысты.

БАҚ мәліметінше, «Ақтөбе» Нанимен бір жылдық келісімшарт жасасқан. Португалиялықтың жалақысы ҚПЛ тарихындағы рекордтық көрсеткіш болады деп күтілуде.

Футболшы 22 қаңтарда Алматыға ұшып келеді, содан кейін ресми таныстырылым үшін Ақтөбеге аттанады.

Нани – «Манчестер Юнайтедтің» бұрынғы ойыншысы, ол ағылшын клубы сапында Чемпиондар лигасын жеңіп, төрт рет АПЛ чемпионы атанды. Сондай-ақ «Спортинг», «Фенербахче», «Валенсия», «Лацио» және басқа клубтарда ойнаған. Португалия құрамасы сапында 2016 жылғы Еуропа чемпионатын жеңген.