«Жеңістің» экс-футболшысы – Кенжебектің «Ахматқа» ауысуы туралы: бұл дұрыс шешім болды

Елордадалық «Жеңіс» клубының бұрынғы қорғаушысы Матия Ром ASnews.kz сайтына берген сұхбатында бұрынғы командаласы Ғалымжан Кенжебектің «Ахматқа» ауысуына қатысты пікір білдірді. Словениялық футболшы Ресей Премьер-лигасы қазақстандық ойыншы үшін керемет трамплин болатынына сенімді.

«Годи (Кенжебек – ред.) өте сапалы футболшы болып қалыптасты. Менің ойымша, ол «Ахматқа» ауысу арқылы әрі спорттық, әрі қаржылық тұрғыдан дұрыс шешім қабылдады. Ол жақта бейімделу сіздер атап өткен басқа лигаларға қарағанда әлдеқайда жеңіл болады. Егер РПЛ-да дамуын жалғастырса, онда оны міндетті түрде топ-клуб немесе Еуропаның мықты чемпионаттарының бірі күтіп тұр. Оның бұған жетуіне барлық мүмкіндігі бар. Сәттілік тілеймін», – деді словениялық қорғаушы.

Грозный клубы Қазақстан құрамасының 22 жастағы вингерімен 4,5 жылдық келісімшартқа қол қойғанын хабарлады.

Матия Ром Ғалымжан Кенжебектің мүмкіндіктерін жақсы біледі: 2024 жылғы маусымда олар «Жеңіс» сапында бірге ойнаған.

Бұған дейін Словения жастар құрамасының бұрынғы қорғаушысы «Жеңіспен» келісімшартын ұзарту мәселесіне қатысты да пікір білдірген болатын.