«Жеңіс» қорғаушысы клубтан кетуі мүмкін: келісімшарт жайлы әлі ортақ мәміле жоқ

«Жеңістің» экс-қорғаушысы Матия Ром ASnews.kz тілшісіне берген сұхбатында елордалық клубпен келісімшартты ұзарту мәселесіне қатысты жағдайды түсіндірді.

«Иә, «Жеңіс» басшылығы келісімшартты ұзартуды ұсынды, бірақ біз әлі ортақ мәмілеге келе алмадық. Қазір Қазақстанға көршілес елдерден нақты қызығушылық бар. Менің білуімше, қазақстандық басқа клубтардан да қызығушылық болды, бірақ әзірге нақты ештеңе жоқ», – деді Ром.

26 жастағы оң қаптал қорғаушысы «Жеңіс» сапында екі маусым өткізді. Ол барлық жарыстарда 60 матчқа қатысып, бір гол соқты және сегіз нәтижелі пас берді. Transfermarkt порталы ойыншыны 350 мың еуроға бағалап отыр.

Бұған дейін футболшының агенті Алеш Милнар «Жеңістің» бұрынғы келісімшартқа ұқсас шарттар ұсынғанын, алайда бұл ойыншы тарапын қанағаттандырмағанын мәлімдеген еді.

Астанаға ауысқанға дейін Словения жастар құрамасының (10 матч) бұрынғы ойыншысы «Домжале», хорватиялық «Шибеник» пен «Интер» (Запрешич), украиналық «Колос» және грузиялық «Телави» клубтарында өнер көрсеткен.