РПЛ клубы Қазақстан құрамасының футболшысын алудан бас тартты

«Динамо Махачкала» клубы «Тоболмен» келісімшартын ұзартқан жартылай қорғаушы Александр Зуевті өз қатарына қоспау туралы шешім қабылдады, деп хабарлайды ASnews.kz.

29 жастағы футболшы Ресей Премьер-лигасына қайта оралуға бір қадам жақын тұрған, алайда бас бапкер қызметіне Вадим Евсеевтің тағайындалуы бұл жоспарға өзгеріс енгізді. Жаңа бапкер Зуевті командаға алу нұсқасын орынсыз деп санап, соның нәтижесінде «Динамо» келіссөздерден бас тартты.

Қостанайдың тумасы туған клубында қалып, келісімшартын 2026 жылдың соңына дейін ұзартты. Сонымен қатар Нұрбол Жұмасқалиевтің командасында вингер позициясында ойнайтын Жаслан Жұмашев пен Дамир Марат та бар.

Бұған дейін Зуев Ресейдің «Спартак», «Крылья Советов», «Ростов», «Рубин», «Химки» және «Арсенал» клубтарында өнер көрсеткен. Ресей чемпионатында 3 гол соғып, 15 нәтижелі пас берген. 18-ші турдың қорытындысы бойынша махачкалалықтар турнир кестесінде 13-орында тұр.