«Атырау» көшбасшысы клубтан кетуі мүмкін: «мұнайшылар» жоғары мақсатқа дайын ба, білмеймін

«Атырау» клубының беларусьтік қорғаушысы Руслан Юденков ASnews.kz сайтына берген сұхбатында өзінің болашағына қатысты жағдайды түсіндірді.

«Иә, келісімшартты автоматты түрде ұзартатын тармақ бар, бірақ әзірге белгісіз болып тұр. Біз оқу-жаттығу жиындарына ұшуымыз керек еді, алайда бұл кейінге шегерілді. Басқа клубтардан түскен ұсыныстарға келсек, олар бұрын да болған, қазір де жақсы нұсқалар бар. Жақын арада нақты шешім қабылдаймыз», – деді Юденков.

Сондай-ақ қорғаушы «мұнайшылардың» алдағы маусымдағы мақсаттары туралы да пікір білдірді:

«Өзіне құрметпен қарайтын әрбір спортшы маусымға жоғары мақсат қояды. Бар мәселе – клубтың мұндай міндеттерге дайын болуында. «Атырауда» бәрі жақсы болады деп үміттенемін және команда үлкен жетістіктерге жету үшін күш салады деп сенемін», – деді футболшы.

Руслан Юденков Қазақстанда 2022 жылдан бері өнер көрсетіп келеді. Бұған дейін «Мақтаарал» мен «Қайсар» клубтарының намысын қорғаған. 2025 жылғы маусымның алғашқы жартысын «Тұранда» өткізіп, жазда «Атырауға» ауысты.

Қазақстан Премьер-лигасының өткен маусымында 21 матчқа қатысып, 3 гол соқты, 2 нәтижелі пас берді.

«Мұнайшылар» маусымды 13-орынмен аяқтап (19 ұпай), ҚПЛ-дағы орнын сақтап қалды. Transfermarkt порталы 37 жастағы ойыншының нарықтық құнын 50 мың еуроға бағалап отыр.

Бұған дейін «Жеңіс» клубының бұрынғы қорғаушысы Матия Ром да елордалық клубпен келісімшартты ұзарту мәселесіне қатысты пікір білдірген еді.