«Ақтөбе» маусымды Астанада бастауы мүмкін

«Ақтөбе» футбол клубы маусым басында өз алаңындағы ойындарын қай стадионда өткізуге болатынын талқылап жатыр, деп хабарлайды ASnews.kz.

Қазақстан футбол федерациясының (ҚФФ) лицензиялау және сертификаттау департаменті «ақ-қызылдардың» маусым басындағы ойындарын ОМБАЖСМ №8 алаңында өткізу мүмкіндігіне күмәнмен қарап отыр. Олимпиадалық резервтегі мамандандырылған спорт мектебіне тиесілі стадионның жасанды төсеніші нашар жағдайда екен.

Қазіргі таңда «Ақтөбе» үшін негізгі нұсқалардың бірі – елордадағы «Астана Арена» стадионы. Бұл – соңғы үлгідегі жасанды төсенішпен жабдықталған, толықтай жабық арена.

Қазақстан Премьер-лигасының 2026 жылғы маусымы 7–8 наурызда басталады. Ал Қазақстан Суперкубогы 28 ақпан күні сарапқа салынады.

Бұған дейін «Ақтөбенің» бұрынғы капитаны Леонель Струмия клубтың басқарма төрағасы болып тағайындалған Арман Оспанов төңірегіндегі дау-дамайға қатысты пікір білдірген еді.