Струмия – Оспановқа қатысты дау туралы: «Ақтөбеге» жақсылық тілейтінін дәлелдесін

«Ақтөбенің» экс-капитаны Леонель Струмия ASnews.kz сайтына берген сұхбатында клубтың жаңа басқарма төрағасы Арман Оспановтың айналасындағы дауға қатысты пікір білдірді.

«Жаңа директордың өткенін ескерсек, жанкүйерлердің реакциясы – қалыпты жағдай. «Ақтөбе» – тарихы мен ірі тұлғалары бар ұлы клуб, сондықтан ол құрметке лайық. Ал фанаттар тек клубтың абыройын қорғап жатыр. Енді қазіргі басшы іс жүзінде «Ақтөбеге» жақсылық тілейтінін және медиада айтқан сөздеріне өкінетінін дәлелдеуі керек. Тараптар ортақ мәмілеге келеді деп үміттенемін. Қазақстанның ең үлкен командасы барлық жағынан дамуы тиіс. Оларға тек сәттілік тілеймін», – деді 33 жастағы жартылай қорғаушы.

«Ақ-қызылдардың» жанкүйерлері басшының қатысуымен өтетін баспасөз мәслихатын өткіздірмей тастаған болатын. Бұған дейін Оспанов әлеуметтік желіде «Ақтөбені» «провинциялық қаланың командасы» деп атап, басты қарсылас – «Қайратқа» деген сүйіспеншілігін ашық білдірген еді.