«Барселонаның» бұрынғы футболшысы Қазақстанға келмей қалуы мүмкін

Қызылорданың «Қайсар» клубы 25 жастағы жартылай қорғаушы Лукас де Веганың трансферінен бас тартуы мүмкін, деп хабарлайды ASnews.kz.

«Қасқырлар» бразилиялық футболшының литвалық «Паневежис» клубымен келісімшарты аяқталмай тұрып-ақ келіссөздер бастаған еді. Алайда ойыншының Қазақстанға келуі қазір үлкен күмән тудырып отыр. Де Вега өзіне түскен ұсыныстарды саралап жатқанда, қызылордалықтар өзге футболшылардың кандидатурасын қарастыруда. Олардың қатарында қазақстандық ойыншылар да бар.

Испания мен Бразилияның жасөспірімдер құрамасында ойнаған Лукас – «Барселона» академиясының түлегі. Ол 2018 жылы каталониялық клубпен бірге жасөспірімдер арасындағы Чемпиондар лигасының жеңімпазы атанған.

Өткен маусымды Лукас де Вега «Паневежис» сапында өткізіп, «гол+пас» жүйесі бойынша 15 ұпай жинап, ел Кубогын жеңіп алды. Сонымен қатар оған Таяу Шығыс клубтары да қызығушылық танытып отыр.