«Ордабасыға» жаңа инвестор келеді: клуб бюджетін арттырғысы келеді

«Ордабасы» футбол клубы биыл ірі инвестормен жұмыс істеуі мүмкін, деп хабарлайды ASnews.kz.

Жағдайдан хабардар дереккөздің мәліметінше, клуб қала әкімдігінен 1,5 миллиард теңгеден артық қаржы алмайды. Бұл қаражат 2026 жылғы Қазақстан Премьер-лигасында (ҚПЛ) жүлделі орындарға күресу үшін жеткіліксіз.

Қазіргі таңда әртүрлі инвесторлармен келіссөздер жүріп жатыр. Олардың бірімен ортақ мәмілеге келген екен. Енді жаңа демеуші «Ордабасының» бюджетін едәуір арттыруы мүмкін. Ал клуб президенті Асхат Сейсембек қазіргі қаражатпен команда чемпионаттың жүлделі орындарына таласа алмайтынын біліп отыр.

Өткен жылы шымкенттік командаға шамамен 3,2 миллиард теңге бөлінген еді. Алайда молдовалық бапкер Андрей Мартиннің жетекшілігіндегі «Ордабасы» ҚПЛ-ды жетінші орынмен аяқтады. Сондай-ақ Қазақстан Кубогының финалында «Тобылдан» жеңіліп, еурокубок жолдамасынан қағылды. Бұқаралық ақпарат құралдарында Мартиннің қызметтен кетуі мүмкін деген әңгімелер болғанымен, бапкер командадағы жұмысын жалғастырады.