Исламхан – болашағы туралы: әзірге бапкер болуды ойлап жүрген жоқпын

Қазақстан құрамасының жартылай қорғаушысы Бауыржан Исламхан ASnews.kz сайтына берген сұхбатында кәсіби мансабын аяқтау және бапкерлік қызметке көшу мүмкіндігі жөніндегі сұраққа жауап берді.

«Біз Елдос Ахметов және Руслан Эсатовпен туған бауырлардай араласамыз. Руслан мен үшін ағам іспетті. Ол «Каспийді» Премьер-лигаға алып шықты, енді туған клубымызды көтеру үшін «Таразға» оралды. Оған тек сәттілік тілеймін. Ол – бөтен адам емес, жерлесіміз.

Ал өзіме келсек, әзірге бапкер болуды ойлап жүрген жоқпын. Қазір басты мақсатым – алаңға қайта оралу. Ал қалғанын уақыт көрсетеді», – деді футболшы.

32 жастағы жартылай қорғаушы қазіргі таңда еркін агент статусында жүр.

Бұған дейін Исламхан «Ордабасының» бұрынғы капитаны Асхат Тағыбергеннің шымкенттік клубтан кетуі жайында пікір білдірген болатын.