Мамаду Мбодж – Сергей Малый туралы: әлі бірнеше жыл ойнап береді

«Ордабасы» клубының бұрынғы қорғаушысы Мамаду Мбодж ASnews.kz сайтына берген сұхбатында Қазақстан құрамасының футболшысы Сергей Малый жайлы айтты.

– 35 жастағы Малый «Ордабасымен» жаңа келісімшартқа қол қойғалы жатыр. Оның ұзақ жылдар бойы жоғары деңгейде ойнауының сыры неде? Бұл ҚПЛ-дегі ойын қарқынының төмендігін көрсетпей ме?

– Мұның бәрі Сергейдің жауапкершілігі мол әрі кәсіби футболшы болуына байланысты. Мен оның тамақтануына, ұйқысына және қалыпқа келуіне қалай мән беретінін көрдім, өзім де көп нәрсе үйрендім. Ол өте ұқыпты, талапшыл футболшы әрі жақсы адам. Тағы бірнеше маусым ойнаса да таңғалмаймын. Бұл Премьер-лиганың жылдамдығына емес, Малыйдың өзіне байланысты.

Тәжірибелі қорғаушы ұлттық құрама сапында 72 матч өткізген. Самат Смақовтың рекордын жаңартып, Қазақстан құрамасының абсолютті рекордсмені атану үшін оған тағы алты ойын қажет.

Өткен маусымда Сергей Малый 30 рет алаңға шығып, бес гол соқты.

Мамаду Мбодж шымкенттік клубта 2023–2024 жылдары өнер көрсетті. Қазір 32 жастағы сенегалдық футболшы Вьетнамның «Тханьхоа» клубында ойнап жүр.