Исламхан – «Қайратқа» оралу жайында: қоңырау шалсам, жоқ демес еді

Қазақстан ұлттық құрамасының бұрынғы капитаны Бауыржан Исламхан ASnews.kz тілшісіне берген сұхбатында «Қайратқа» қайта оралу мүмкіндігі туралы сұраққа жауап берді.

«Қайрат» – мен үшін жақын клубтардың бірі. Мен өзім оларға хабарласпадым. Біраз уақыт ойнамадым, одан кейін «Ордабасыға» кетіп қалдым. Сол себепті хабарласуға мұршам бармады», – деді Исламхан.

Дегенмен, Бауыржан клубтың бақылау кеңесінің төрағасы Қайрат Боранбаевпен жақсы қарым-қатынаста екенін және егер көмек сұраса, беті қайтпайтынына сенімді.

«Алайда «Қайрат» мен үшін орны бөлек. Бір ауыз сөз айтып, Қайрат Советайұлына қоңырау шалсам, жоқ деп айтпайтын еді деп ойлаймын.

Қайрат ағамен байланыстамын. Соңғы рет ҚФФ-ның марапаттау рәсімінде көрістік», – деп қосты ойыншы.

Еске салайық, Бауыржан Исламхан ұзақ жылдар бойы «Қайраттың» капитаны болды. Ол алматылық клуб сапында 2014-2019 жылдар аралығында өнер көрсетіп, Қазақстан Кубогы мен Суперкубогын бірнеше рет жеңіп алған болатын.

Бұған дейін Исламхан «Астана» клубымен болашағы әлі белгісіз екенін мәлімдеді.