ЧЛ-да «Қайратқа» гол соққан «Спортинг» түлегі «Қайсарға» ауысуы мүмкін

Қызылордалық «Қайсар» словениялық «Олимпияның» португалиялық жартылай қорғаушысы Диогу Пинтуға қызығушылық танытып отыр, деп хабарлайды ASnews.kz.

Дереккөздің мәліметінше, «қасқырлар» 26 жастағы шабуылдайтын жартылай қорғаушыны шабуыл шебін күшейтетін негізгі ойыншы ретінде қарастыруда. Алайда футболшының Қазақстан премьер-лигасында мансабын жалғастырудың басқа да нұсқалары бар.

Айта кетейік, Пинту биылғы маусымда қазақстандық клубқа қарсы ойнаған болатын. Чемпиондар лигасының 2025/26 жылғы маусымының бірінші іріктеу кезеңінде шабуылшы Люблянада «Қайрат» қақпасына гол соқты, ал кездесу тең есеппен аяқталды (1:1).

Диогу Пинту – лиссабондық «Спортингтің» түлегі. Бұған дейін ол италиялық «Асколи» мен «Потенца», португалиялық «Эштрела», «Вилафранкенсе» және «Бенфиканың» жастар командасында өнер көрсеткен. Transfermarkt порталы ойыншыны 400 мың еуроға бағалап отыр.

Ағымдағы маусымда португалиялық футболшы «Олимпия» сапында барлық жарыста 25 матч өткізіп, сегіз гол соқты және төрт нәтижелі пас берді.