Жасұлан Әмір – Молдоваға қарсы ойын жайлы: чемпиондықты тойламадық, бар ойымыз ертеңгі күнде

Қазақстан ұлттық құрамасы мен шымкенттік «Ордабасының» жартылай қорғаушысы Жасұлан Әмір ASnews.kz тілшісіне берген сұхбатында Ұлттар лигасы аясындағы Молдовамен өтетін кездесуден не күтетінін айтты.

«Түркістандағы оқу-жаттығу жиынын жақсы өткізіп, кеше түнде Молдоваға жеттік. Ертеңгі ойынға толықтай дайынбыз. Алаңда барымызды салып, тек жеңіс үшін ойнаймыз. Алдыңғы сәтсіздіктерден кейін психологиялық тұрғыда қиын болады деп ойлаған едік, бірақ қазір бар назарымыз алдағы матчта. Әлі де екінші орын алуға мүмкіндігіміз бар. Қалған екі ойында жүз пайыз күшімізді салып, алты ұпай алуға тырысамыз», – деді Әмір.

Сондай-ақ футболшы ұлттық құрамадағы бейімделу процесі мен клубтағы жеңісі туралы сөз қозғады.

«Құрама сапына «Ордабасыдан» үш ойыншы келіп қосылдық. Чемпиондықты тойлап та үлгермедік, бірден осында келдік. Ал менің құрамадағы бейімделуіме келсек, жігіттердің барлығы, әсіресе Темірлан Ерланов, Бауыржан Исламхан және Нұралы Әліп көп көмектесіп жатыр», – деп қорытындылады сөзін жартылай қорғаушы.

Еске сала кетейік, Молдова мен Қазақстан құрамалары арасындағы матч 13 қарашада Кишиневтегі «Зимбру» стадионында өтеді. Ойын Астана уақытымен 22:00-де басталады. Бұл кездесу алдында Қазақстан құрамасы C3 тобында екі ұпаймен соңғы орында келеді.

Өткен маусымда Жасұлан Әмір «Ордабасы» сапында Қазақстан чемпионы атанып, ел Кубогын жеңіп алды – шымкенттік клуб өз тарихында алғаш рет «алтын дубль» жасады.

Андрей Мартин: Молдова құрамасы Қазақстаннан басым емес