«Ертіс» Беларусь футболшысын алғысы келеді: КАМАЗ 130 миллион теңге сұрауда

Павлодарлық «Ертіс» беларусьтік қорғаушы Максим Буркомен келіссөздер барысында қиындықтарға тап болды, деп хабарлайды ASnews.kz.

21 жастағы КАМАЗ клубының ойыншысына «Ертіс» қатты қызығушылық танытты, бірақ ҚПЛ-ға енді ғана шыққан павлодарлықтар оның трансфері үшін ақша төлеуі тиіс. Ресейлік клуб Буркомен қоштасқысы келмегендіктен, оны тек сатып алуға болады.

«БАҚ-та мынадай ақпарат тарады: КАМАЗ Максимге үміт артып отыр және оны келісімшартта көрсетілген сомадан аз ақшаға босатуды жоспарламайды», – деп растады ойыншының агенті Евгений Сызаркин.

Ресейлік БАҚ-тың хабарлауынша, оны сатып алу құны 20 миллион рубльді (130 миллион теңге) құрайды. Биылғы маусымда АБФФ академиясының түлегі 14 матч өткізді.

Павлодарлық клуб енді басқа ойыншылардың кандидатурасын қарастырады. Клуб сонымен қатар жаңа бас бапкер іздеуде.