ҚПЛ-дың үздік сұрмергені «Астанадан» кетуге жақын

«Астана» футбол клубы өз көшбасшысы – шабуылдайтын жартылай қорғаушы Назми Грипшиді сатуға дайын, деп хабарлайды ASnews.kz.

Өткен маусымда 28 жастағы футболшы 26 ойын өткізіп, 16 гол соқты және 7 нәтижелі пас берді. Грипши Дастан Сәтпаев пен Марин Томасовты артқа тастап, чемпионаттың үздік сұрмергені атанған болатын.

Албания құрамасының ойыншысына MLS (АҚШ пен Канаданың жоғарғы футбол лигасы) клубтарының бірі қызығушылық танытып отыр. Грипши ауысуы мүмкін команда оны «Астанадан» сатып алуға дайын.

Албаниялық футболшының елордалық клубпен келісімшарты келесі жылдың жазына дейін жарамды. Грипшидің трансферлік құны 1,5 миллион еуроға бағаланып отыр.

«Астанаға» дейін сұрмерген албаниялық «Теута» мен «Скендербеу», сондай-ақ «Балкани» (Косово) клубтарында өнер көрсеткен.