«Барселона» экс-футболшысының агенті: «Қайсардың» ұсынысын қарастырып жатырмыз

Литвалық «Паневежис» клубының жартылай қорғаушысы Лукас де Веганың агенті Фелипе Мело ASnews.kz сайтына берген сұхбатында ойыншының болашағы туралы әлі шешім қабылданбағанын айтты.

«БАӘ-дегі клубпен келісімшарт? Біз қазіргі уақытта ешқандай ұсынысты қабылдаған жоқпыз – барлық нұсқалар ашық. «Қайсардан» да әлі бас тартқан жоқ», - деді агент.

Бұған дейін «Барселона» түлегі «қасқырлардың» ұсынысынан бас тартып, БАӘ командасына ауысқалы жатыр деген ақпарат тараған болатын. Оның «Паневежиспен» келісімшарты осы жылдың соңында аяқталады.

Өткен маусымда Де Вега 36 матч өткізіп, сегіз гол соқты және екі нәтижелі пас берді. «Блауграна» академиясында жартылай қорғаушы Алехандро Бальде, Гави және Ансу Фатимен бірге ойнаған.