Легионер – ҚПЛ клубтарындағы басшылар туралы: ағаңыз немесе құдаңыз жоғарыда отырса, адаспайсыз

«Атырау» және Конго Демократиялық Республикасының бұрынғы футболшысы Жоэль Каямба ASnews.kz сайтына берген сұхбатында Қуандық Жақиялиевтің «мұнайшылар» сапында директор болып тағайындалуына қатысты пікір білдірді.

«Мұнда қызметті адалдық үшін үлестіре ме? Футболдан хабары жоқ адам трансферлерді қалай жасайды? Футбол дейтін тұтас саланы қалай түсінеді? Әркімнің өз орны бар, бірақ Қазақстанда бұл қағида жұмыс істемейді. Мұнда бәрі билікке байланысты өзгеріп отырады. Егер сіздің ағаңыз немесе құдаңыз жоғарыда отырса, адаспайсыз», – деді Каямба.

Шабуылшының айтуынша, ҚПЛ-дағы командалар «Қайратқа» еліктеуі керек:

«Егер мемлекет клубтарға ақша беруді тоқтатса, бәрі өзгерер еді, өйткені ол кезде әрбір шенеунік инвестицияны жеке өзі салатын болады. «Қайратқа» қараңызшы – олар бүкіл Еуропаға үлгі болған клубтың бірі. Олардың иесі ақшасын ақылмен жұмсайды, ал ол үшін бұл бизнес. Сондықтан мен Боранбаевтың командасы жыл сайын Чемпиондар лигасында ойнауға лайық деп санаймын.

Егер Премьер-лигадағы әр клуб «Қайрат» сияқты жұмыс жасаса, басшылықтан аты жоқ, заты жоқ адамдарды көрмейміз, себебі ол кезде әрбір адам клуб үшін жұмыс істейтін болады. Ал қазір олар мемлекеттің ақшасын пайдаланып, ойыншылардың алдында қарызға батып жатыр».

Бұрын мұғалім және Геолог, Ақсай ауылдық округтерінің әкімі болған Қуандық Жақиялиев қыркүйек айында «Атырауда» басшылық қызметке кірісті. Ол сондай-ақ клуб құрылымында балаларды жаттықтырумен айналысты.

«Мұнайшылар» әлі күнге дейін шетелдік ойыншыларға қарыз. Егер басшылық жақын арада оларға қазан айындағы жалақылары мен бонустарын төлей алмаса, легионерлер ФИФА-ға шағымдануды жоспарлап отыр.