Жоржиньо «Олимпиакосқа» жеңілу жайлы: басқа қалада жүргенімізді сезіндік

«Қайрат» шабуылшысы Жоржиньо Чемпиондар лигасы матчында грекиялық «Олимпиакосқа» (0:1) есе жіберуі туралы пікір білдіріп, команданың өз алаңында ойнамағандай сезінгенін ашық айтты, деп хабарлайды ASnews.kz.

«Ойын басталмай жатып басқа қалада жүргенімізді сезіндік десем де болады. Мүмкін Алматыда ойнағанда бәрі басқаша болар ма еді. Дегенмен, өткен өтті, өкінудің қажеті жоқ. Қарсыласқа келер болсам, өте мықты ұжым. Бұл Чемпиондар Лигасы болғандықтан, әлсіз команда жоқ», – деді Жоржиньо.

«Қайрат» Чемпиондар лигасының жалпы кезеңінің алтыншы турында «Олимпиакосқа» 0:1 есебімен жеңілді. Астанадағы матчта 73-минутта португалиялық Желсон Мартинш жалғыз жеңіс голын салды.

«Олимпиакос» биылғы Чемпиондар лигасындағы алғашқы жеңісіне қол жеткізсе, «Қайрат» бесінші рет жеңіліс тапты.

«Қайраттың» қаңтар айында Чемпиондар лигасындағы екі кездесуі қалды: 20-ында өз алаңында бельгиялық «Брюггемен» және 29-ына қараған түні Лондонда «Арсеналмен» ойнайды.