Премьер-лигадағы орнын сақтап қалған «Атырау» легионерлерге жалақы төлемеген

«Атырау» футбол клубы қазан айының жалақысын және сыйақыларды футболшыларға әлі күнге дейін төлемеген, деп хабарлайды ASnews.kz.

Чемпионат аяқталмай тұрып-ақ Қазақстан Премьер-лигасының 2026 жылғы маусымында өнер көрсетуін қамтамасыз еткен «мұнайшылардың» ойыншылар алдында қарызы бар.

«Бұл ақпаратты барлығы да білгенін қалаймын: «Атырау» әлі күнге дейін легионерлерге қазан айының жалақысын да, сыйақыларын да төлемеді. Басшылық бізге Қазақстан Премьер-лигасындағы орынды сақтап қалғанымыз үшін сыйақы береміз деп уәде еткен. Бірақ қазір сол сөзінен тайып отыр», – деді редакцияға хабарласқан футболшылардың бірі.

«Бұл жайт ФИФА-ға шағымдануға әкеп тұр. Шетелдік ойыншылар болып енді осындай шараға баруға мәжбүрміз», – деп қосты ойыншы.

Айта кетейік, бірнеше ай ішінде «Атырау» клубы төрт бас бапкер ауыстырған. Бас менеджер қызметін Дидар Сыдықбек атқарған команда 26 матчта төрт рет жеңіске жетіп, жарыс кестесінде Премьер-лигада аман қалуға мүмкіндік беретін 13-орынды иеленді.