Қашкен – «Жальгириске» ауысуы жайлы: Литвада еш қиналмай ойнауға болады

25 жастағы қазақстандық қорғаушы Дінмұхаммед Қашкен ASnews.kz сайтына берген сұхбатында «Жальгириске» қалай ауысқанын айтып берді.

– «Жальгиристің» деңгейіне сай болдың ба? Жергілікті сарапшылар олай ойламады. Біз сен қатысқан ойындарды мүлдем көре алмадық. Алаңға шыққан кезде олардың деңгейіне сай екеніңді сезіндің бе?

– Бас бапкер ол кезде маған көп сенім арта бастады. Мен 15-20 матч өткіздім. Бір маусымда 50 ойын бар еді. «Жальгиристің» деңгейінде еш қиналмай ойнауға болады деп есептеймін. Ол жаққа бейімделіп қалған едім, оның үстіне, чемпионат та анау айтқандай мықты емес. «Жальгириске» жақсылап жайғасып, тіпті одан да жоғары деңгейге кетуге болар еді. 

– «Жальгириске» ауысу туралы нұсқа қалай пайда болды?

– Түркияда «Шахтермен» бірге жаттығу жиынына қатысып, келісімшартқа отырып қойған едім. 2021 жылы ұлттық құрама сапында ҚПЛ легионерлеріне қарсы жолдастық матч өткізген күннің ертесіне Чебурин хабарласып, командасына шақырды. Келісімшарт дайындап қойғанын және мені негізгі құрамнан көретінін жеткізді. Сол кезде әкем Түркияда жүрген еді. Ол кісімен ақылдасып, Еуропаға кету туралы шешім қабылдадым. «Жальгирис» сол жылы Чемпиондар лигасында ойнап жатты. Тез арада шешім қабылдап, мен сол күні «Шахтерға» келісімшартты бұзу туралы өтініш жасадым. Олар қарсы шықпады. Кешкісін «Жальгириспен» келісімшартқа отырдым.

– Литва несімен таңқалдырды?

– Ол жақта ашық футбол ойнайды. Сол жылы чемпионаттың деңгейі де, біздің команда да мықты болды. Он тур бұрын чемпион атандық. Деңгейіміз анық көрініп тұрды. Қалған он ойында өз рахатымызға ойнадық.

– Чебуринді бұрын танитын ба едің?

– Оған дейін таныс емес едік. «Шахтерда» жүрген кезімде алғаш рет хабарласты. Ол кезде қарағандылықтарды Магомед Адиев жаттықтыратын. Маруаұлы мені ұлттық құраманың жолдастық матчына шақырды. Сол ойыннан кейін Чебурин хабарласып, командасына шақырды. Екі жылдық келісімшартқа отырдым.

Қашкен 2022 жылы «Жальгирис» сапында өнер көрсетті. Литвалық клубта 14 матч өткізіп, кейін «Шахтерға» ауысты.