Қалдыбеков – «Қайсарға» ауысуы жайлы: Кумыковтың сенімінің арқасында ауыстым

«Қайсардың» жартылай қорғаушысы Ерсұлтан Қалдыбеков ASnews.kz тілшісіне берген сұхбатында бапкер Виктор Кумыковпен жұмыс істеу тәжірибесі және жазғы трансферлік таңдауы туралы айтты.

– Маусымның екінші жартысында Виктор Балютұлы Кумыковтың қоластында ойнадыңыз. Бапкердің командамен және сізбен қарым-қатынасыңыз жайлы айтсаңыз. Ол баптаған барлық ойыншы маманның өте мықты екенін атап өтеді.

– Ол өте тәжірибелі маман. «Қайсарға» келгеннен кейінгі алғашқы теориялық сабақтар кезінде ол кісіден біраз нәрсе түйіп алдым. Оның өзінің футбол философиясы бар. Сол ойынымен біраз командаларда жақсы нәтижелерге жетіп жүрді. Барлық қарсылас «Қайсардың» стандарттарынан қорқатын. Стандарттық жағдайлар – Виктор Балютұлының негізгі қаруы. Барлық қарсыластар әсіресе осы сәттерге көп назар бөлетін.

– Жаз мезгілінде де сізде бірнеше клубтан ұсыныс болды. Не себептен «Қайсарды» таңдадыңыз?

– Виктор Балютұлы тікелей маған хабарласты. Сол кезде ол маған толық сенетінін және негізгі құрамда ойнауға мүмкіндік беретінін айтты. Дәл сол себептен «Қайсарға» көшемін деп шештім.

2025 жылғы маусымда Ерсұлтан Қалдыбеков жазғы трансферлік терезеде «Атыраудан» «Қайсарға» ауысып, қызылордалық клубтың негізгі ойыншыларының біріне айналды. 23 жастағы жартылай қорғаушы Премьер-лигада 22 матч өткізіп, бір голдық пас беріп, тұрақты құрамда өнер көрсетті. «Қайсар» маусымды 11-орында аяқтап, 22 ұпай жинады және бірде-бір легионерсіз ойнаған жалғыз команда болды.

Бұған дейін Қалдыбеков өткен маусымға баға беріп, команданың ішкі атмосферасы туралы айтты.