Ерсұлтан Қалдыбеков: «Қайсардағы» атмосфера – таза қазақи рухта

Қызылордалық «Қайсардың» жартылай қорғаушысы Ерсұлтан Қалдыбеков ASnews.kz тілшісіне берген сұхбатында өткен маусымға баға беріп, команданың ішкі атмосферасы туралы айтты.

«Өткен маусымға ешқандай ренішім жоқ. Керісінше, оң баға беремін. Ол мен үшін трамплин сияқты болды, өйткені Қазақстан Премьер-лигасында ең көп ойын өткізген маусымым болды. Алаңға негізгі құрам ойыншысы ретінде шықтым. Алайда бұл менің шарықтау шегім емес екенін түсінемін», – деді Қалдыбеков.

«Қайсардың ішкі атмосферасы өте керемет. Тек қана қазақтар болған соң, барлық іс-шаралар «өзіміз отырып шай ішейік» форматында өтті. Бәрі таза қазақша сөйлейді. Команда рухын ұстап жүрген жігіттер бар – Айбол Әбікен, Думан Нәрзілдаев, Абылайхан Төлегенов, Қуаныш Қалмұратов және Әділет Кеңесбек ағаларымыз. Сол кісілерге үлкен алғыс айтам. Мені жылы қабылдады және команданың ішкі өмірімен жақсы таныстырды», – деп қосты футболшы.

Жазғы трансферлік терезеде «Атыраудан» «Қайсарға» ауысқан 23 жастағы жартылайқорғаушы 2025 жылғы маусымда Премьер-лигада 22 ойын өткізіп, бір голдық пас берді. Қызылордалық клуб маусымды 11-орында аяқтап, 22 ұпай жинады. Айта кетерлігі, «Қайсар» биылғы маусымды легионерсіз өткізді.