Эль-Мессауди – «Ақтөбеге» ауысуы жайлы: біреу менен бас тартты деп айтудан ұялмаймын

«Тобыл» командасының жартылай қорғаушысы Ахмед Эль-Мессауди ASnews.kz сайтына берген сұхбатында «Ақтөбеге» ауысуы туралы сыбысқа тоқталды. Бұған дейін команданың бас бапкері Николай Костов артық салмағына байланысты оның кандидатурасынан бас тартқаны туралы ақпарат тараған еді.

«Шын мәнінде, бұл рас болуы мүмкін. Костов мені жақсы танымайды, мен алғаш рет «Ақтөбемен» байланысқан кезде басшылықта мүлдем басқа адамдар отырды. Бұл бірнеше ай бұрын болған жағдай.

Бірақ біреу менен бас тартты деп айтудан ұялмаймын. Әркімнің өз пікірі бар және ешкімді мені ұнатуға мәжбүрлей алмаймын», – деді футболшы.

30 жастағы марокколық жартылай қорғаушы 2025 жылғы маусымда 26 матч өткізіп, жеті гол соқты, сегіз ассист жасады. «Тобыл» сапында Эль-Мессауди Қазақстан кубогын және чемпионаттың қола жүлдесін жеңіп алды.