Кристиан Новак – Кенжебек туралы: Қазақстанның мақтанышына айналатын мүмкіндігі бар

«Хартс» командасының бұрынғы қорғаушысы Кристиан Новак ASnews.kz сайтына берген сұхбатында Ғалымжан Кенжебекпен бірге «Жеңіс» клубында өткізген уақыты туралы айтып, ойыншының керемет жетістіктерін атап өтті.

«Ғалымжанды көрген сәтте оның шабуылда керемет дүниелер жасай алатынын түсіндім. Маған бұл жігіттің қиындықтардан қорықпайтыны және оларды жеңетіні ұнайды. Ол өте жылдам ойыншы, алыс қашықтықтан тамаша соққы жасайды.

Еуропадағы тәжірибесінен кейін Кенжебек батыл және сенімді бола бастады. Оның енді көбірек еркіндік алғанына қуаныштымын, бірақ бұл оның толыққанды деңгейі емес. Ол әлі жас, сондықтан әрі қарай дамып, Қазақстанның мақтанышына айналатын мүмкіндігі бар», - деді Новак.

Биылғы маусымда «Елімай» командасының 22 жастағы шабуылшысы 10 матч өткізіп, алты гол мен төрт нәтижелі пастың авторы атанды. Сондай-ақ Қазақстан құрамасында үш гол соқты.

ASnews.kz сайтының хабарлауынша, Ислам Чесноковты қатарына қосатын «Хартс» клубы Кенжебекті де бақылап отыр.

Кристиан Новак 2025 жылдың шілдесінде «Жеңіс» командасынан кетіп, Өзбекстанның «Андижан» командасына ауысты. Бұған дейін поляк қорғаушысы Польша, Хорватия, Грекия, Румыния және Ирландия клубтарында доп тепкен. Ол Қазақстанға 2024 жылы келіп, Премьер-лигада бір жарым маусым өткізді.