Кафанов – Қалмұрзаның қателігі жайлы: болған жағдайды ұмытып, алға жылжу керек

Кезінде Қазақстан құрамасында қақпашылардың бапкері болып жұмыс жасаған Виталий Кафанов ASnews.kz сайтына берген сұхбатында Шерхан Қалмұрзаның «SD Family» командасына қарсы ойында алаңның ортасынан жіберіп алған голына қатысты пікір білдірді.

«Мен Шерханды қолдайтынымды айтқым келеді. Әрбір қақпашы қандай деңгейде болса да қателіктер жібереді – бұл тек олардың дамуына көмектеседі. Құдайға шүкір, жіберіп алған гол ойынның нәтижесіне әсер еткен жоқ. Қалмұрза бұдан сабақ алып, оның қайталануына жол бермейді деп сенемін.

Ол болған жағдайды талдап, тез ұмытып, алға қарай жылжиды деп үміттенемін», – деді 65 жастағы бапкер.

SD Family командасының жартылай қорғаушысы Артур Дадаханов Бірінші лиганың 26-шы турында «Қайрат» қақпасына алаң ортасынан гол соқты. Бұған дейін 18 жастағы Қалмұрза «Спортингке» (1:4) және «Реал Мадридке» (0:5) қарсы ойнаған болатын.

Қазіргі уақытта Кафанов Ресей құрамасында Валерий Карпиннің штабында жұмыс істейді. Кезінде «Рубин» және «Ростов» клубтарында бапкерлік еткен.