«Хартстың» экс-ойыншысы – Чесноков туралы: мұнда еркелікті ұнатпайды, еркек болып қалу керек

«Хартс» және Литва құрамасының бұрынғы қорғаушысы Саулюс Миколиюнас ASnews.kz тілшісіне команданың чемпион атану мүмкіндігіне баға берді. Қаңтар айында шотландиялық клубқа Ислам Чесноков қосылады.

«Рейнджерс» осы маусымда үлкен мәселеге тап болып, дағдарысқа ұшырады. Сондықтан қазір 20 жыл бұрынғы картинаны көріп отырмыз, ол кезде «Хартс» күміс жеңіп алған еді. Клуб өз тарихында маусымды мұншалықты сәтті бастаған емес, сондықтан мен жігіттер үшін қуаныштымын. Макиннес келгелі бері керемет ойнауда, енді оларды «Селтикке» қарсы принципиальды матч күтіп тұр», – деді экс-футболшы.

Миколюнас «Тобыл» вингері көпшіліктің сүйікті футболшысына айналуы мүмкін екенін айтты:

«Шотландияда футбол дін сияқты, ал Эдинбургте ең мықты футбол фанаттары өмір сүреді. Чесноков білуі керек бір нәрсе бар: кімнен жеңілсең де, «Хибернианға» жол бермеу керек. Ол алаңда жанын салса да, аталмыш дербиде жеңіске жетуі тиіс (күлді). Мұнда ерке футболшыларды ұнатпайды, сені қанша құлатса да, еркек болып қалу керек».

«Хартс» сегіз турдан кейін 22 ұпаймен Шотландия чемпионатында көш бастап келеді. 26 қазанда 54 жастағы маманның командасы екінші орында тұрған «Селтикті» қабылдайды. Жеңіске жетсе, олардан сегіз ұпайға ұзап кетеді.

Чесноков «Тобылмен» келісімшарты аяқталған соң «Хартсқа» ауысады. Осы маусымда қазақстандық футболшы 10 гол соғып, төрт нәтижелі пас берді, сонымен қатар Қазақстан кубогын жеңіп алды.