Чинеду – бабына келуі жайлы: эмоцияға берілмей, еркін ойнай бастадым

«Астана» шабуылшысы Джеффри Чинеду ASnews.kz тілшісіне берген сұхбатында осы маусымда психологиялық қысымға тап болғанын және бұл тығырықтан қалай шыққанын айтып берді.

«Бұл қалыпты жағдай. Өткен жылды өте жақсы өткіздім, ал биылғы маусымда бәрі менен одан да көп нәрсені күтіп қалды. Стресс, эмоциялар – мұның бәрі маған қатты әсер етті. Маусымның басынан-ақ мен көп ойланып жүрдім. Гол соқпаған кезде ашуланып, мұңайып, өз-өзімнен көңілім қалды.

Жаттықтырушыммен және отбасыммен сөйлестім, олар мені қолдады. Жақында «Тобылға» гол соқтым, ал бүгін хет-трик жасадым. Мен жай ғана эмоцияға берілмей, еркін ойнай бастадым», – деді шабуылшы.

ҚПЛ 25-ші турында «Ақтөбеге» қарсы ойында Джеффри Чинеду хет-трик жасап, «Астананың» 5:3 есебімен жеңіске жетуіне сеп болды.