«Ақтөбе» футболшыларының бәс тігуіне қатысты тың деректер жарияланды

«Ақтөбенің» бұрынғы футболшылары мен бапкерлері түрлі спорттық жарыстарға бәс тіккені әшкере болды, деп хабарлайды ASnews.kz.

Олардың арасында 2023-2024 жылдар аралығында ойнаған футболшылар мен жаттықтырушылар штабының мүшелері бар.

ҚР Бас прокуратурасы осы жағдайға қатысты тексеру жүргізіп жатыр.

Бұған дейін Бас прокуратура ойыншылар мен бапкерлердің еңбек келісімшарттарында көрсетілген нақты тыйымға қарамастан, бәс тігу фактілері анықталғанын хабарлаған болатын.

«Бекітілген тыйымға қарамастан, футболшылар мен жаттықтырушылар букмекерлік кеңселерде бәс тігуді жалғастырды. Нақтырақ айтсақ, «Ақтөбедегі» тоғыз футболшы жалпы сомасы 110 миллион теңгені құрайтын бәс тіккен», – делінген Бас прокурор Берік Асыловтың депутаттық сауалға берген ресми жауабында.

Бұл ақпарат алғаш рет БАҚ беттерінде 2025 жылдың басында жарияланған еді, бірақ кейіннен тағы да әртүрлі порталдарда қайта таратылды. ҚПЛ-дың ең маңызды матчтары алдында ақпараттың қайта тарауы кімге пайдалы екені әзірге белгісіз.