Сейдахмет – «Зениттегі» қаралымы жайлы: бразилиялық командаға бес гол соқтым

«Ақтөбе» клубының жартылай қорғаушысы Еркебұлан Сейдахмет YouTube-тағы «Футбол Жолы» арнасына берген сұхбатында «Зенитте» қаралымнан өткен кезін еске алды, деп хабарлайды ASnews.kz.

«Зениттің» жастарымен бірге Италияға турнирге бардық. «Эмполидің» жатарымен ойнап, 1:1 есебімен тең тарқастық. Италияның тағы бір командасымен кездесіп, олардан ұтылып қалдық. Сосын бразилиялық команданы 8:0 есебімен жеңдік. Мен сол кезде бірінші таймда бес гол (пента-трик) соқтым. Ол матчта шабуылшы ретінде ойнадым.

«Зенит» мені қатарына қосқысы келді, тіпті келісімшарт ұсынды. Бірақ жасым 17-де еді. Ресейлік клубқа ауысу үшін 18 жасқа толуым керек болды. Сосын Ваит Талғаев мені «Таразға» алып кетті», – деді Сейдахмет.

Еркебұлан 18 жасқа толғаннан кейін Ресейдің үш клубынан ұсыныс түскенін мәлімдеді:

«18 жасқа толғаннан кейін Ресейдің үш клубынан ұсыныс түсті: «Уфа», «Зенит» және «Рубин». Ең қатты қызыққаны «Уфа» болды. Оның үстіне, сол кездегі команданың бас бапкері Сергей Семакпен де сөйлестім. «Уфамен» бірге екі оқу-жаттығу жиынына қатысып, осы клубқа ауысу туралы шешім қабылдадым. Бір жылдан кейін «Зенит» мені «Уфадан» сатып алғысы келді. Бірақ бұл ұсынысты қарастырмадық».

Сейдахмет 2018-2019 жылдар аралығында «Уфада» ойнап, кейін болгариялық «Левскиге» ауысты.