Еркебұлан Сейдахмет: маусым басында польшалық клубқа ауысуға жақын болдым

«Ақтөбе» клубының жартылай қорғаушысы Еркебұлан Сейдахмет YouTube-тағы «Футбол Жолы» арнасына берген сұхбатында осы маусымның басында БАӘ және Польша клубтарымен келіссөз жүргізгенін растады, деп хабарлайды ASnews.kz.

«Келіссөздердің болғаны рас. Польшаның нақты қай клубы екенін айта алмаймын, ұсыныс жасады. Бірақ соңғы сәтте ол жақта басшылық ауысты ма, әлде бапкер ауысты ма, трансфер жүзеге аспай қалды. Негізі Польшаға кетуге дайындалып жатқан едім. «Ақтөбенің» алғашқы оқу-жаттығу жиынына қатыспай, екіншісіне қосылып, ақпан айына дейін демалып қалдым. БАӘ клубтарымен де сөйлестік. Бірақ уақыт аз болғандықтан, Қазақстанда қалу туралы шешім қабылдадым», – деді 25 жастағы футболшы.

Еркебұлан «Ақтөбеге» ауысу үшін «Жеңіс» клубының ұсынысынан бас тартқанын мәлімдеді: 

«Егер Қазақстанда қалатын болсам, бірінші кезекте «Ақтөбені» таңдайтынымды айттым. Мені «Жеңіс» клубы да шақырған еді. Тіпті «Ақтөбеге» қарағанда көп жалақы ұсынды. Бірақ «Ақтөбеде» ойнап көруім тиіс деп, осында ауыстым. Мұнда өзімді бақытты сезінемін, барлығы ұнайды»..

Еркебұлан осы маусымда 20 матчқа қатысып, 1 гол мен 4 ассист рәсімдеді.