Артур Шушеначев – ФНЛ туралы: Израильден кейін ол жаққа бейімделу қиын болды

Қазақстан құрамасының шабуылшысы Артур Шушеначев YouTube-тағы «Футбол Жолы» арнасына берген сұхбатында ресейлік «Сочи» клубында өткізген кезеңі жайлы пікір білдірді, деп хабарлайды ASnews.kz.

«Көптеген адамдар ФНЛ-дың деңгейі төмен деп ойлайды. Бірақ бұл шын мәнінде өте жақсы чемпионат. Мұнда басты назар физикаға бағытталған: командалар көп жүгіреді, талас көп болады, футболға көңіл аз бөлінеді. Бұл қиын чемпионат. «Хапоэльден» кейін Ресейге бейімделу қиынға түсті – Израильдегі аутсайдер командалардың өзі пас арқылы ойнап комбинация жасауға тырысады. Ал ФНЛ-да барлығы нәтижеге негізделген: допты алысқа теуіп жібереді, талас көп болады», – деді Шушеначев.

Артур Ресейге бейімделіп, бірте-бірте бабына келгенін атап өтті:

«Сочиде» бәрі жақсы болды; мен бәріне үйреніп кеттім. Бапкер мені Ресей кубогында жиі ойната бастады, маған қосалқы құрамнан шыққанша, алғашқы минуттан бастап ойнаған оңайырақ. Оның үстіне, жарақатымнан енді ғана айыққан едім. Бұрын артық салмағым болды, сол себепті қалыпқа келу қиынға соқты».

2024 жылдың ақпанында Артур шетелде бағын сынап көру үшін израильдік «Хапоэль Беер Шеваға» ауысты, кейін «Сочиге» барып, ФНЛ мен Ресей кубогында 10 матч өткізді. 2025 жылы Қазақстанға оралып, «Ақтөбемен» келісімшартқа отырды.