Садыбеков: үш ойында бар күшімізді салып, чемпиондыққа жетеміз

Алматылық «Қайраттың» жартылайқорғаушысы Әділет Садыбеков ASnews.kz тілшісі Әлім Динасыловқа берген сұхбатында «Реалға» қарсы өткен ауыр ойынды және алдағы жоспарларды бөлісті.

«Физикалық та, психологиялық та тұрғыдан осындай ойындардан кейін қалыпқа келу оңай емес. Өйткені үлкен командаға қарсы ойнап, содан кейін өзіміздің ішкі чемпионатымызға оралу қиындау. Бірақ үмітімізді үзбей, чемпиондық ойынымызды көрсеткіміз келеді. Үш ойын қалды. Жоспарлаған чемпиондығымызға жетеміз деп ойлаймын.

Әрине, командадағы барлық ойыншы әр матчтың қаншалықты маңызды екенін түсінеді. Алдағы үш кездесуде бар күшімізді саламыз және чемпион боламыз деп сенемін», – деді Садыбеков.

Ойыншы «Реалға» қарсы ойында қолдауға келген жанкүйерлерге де алғысын білдірді:

«Бізді қолдап келген жанкүйерлерге мың алғыс. Әр ойында осындай қолдау болса, риза болатын едік».

Еске салайық, «Қайрат» Лиссабонда «Спортингке» (1:4) және Алматыда «Реал Мадридке» (0:5) есе жіберіп, енді назарын Қазақстан Премьер-лигасына қайтарады. Алматылықтар турнир кестесінде чемпиондық үшін күресті жалғастырып келеді. Келесі матч 5 қазан күні «Жетісуге» қарсы өтеді.